تعال نشوف أهم معايير انشاء موقع ويب رهيب

لما تفكر في انك تسوي موقع ويب، لازم تتأكد إنه تصميم الموقع ومحتواه يعكس علامتك التجارية ويعبر عن أهدافك من أول نظرة وانطباع.

طيب كيف أضمن هالشيء؟ وكيف أعرف إني شغال صح وماشي بالطريق الصحيح في انشاء موقع ويب احترافي ومعبر عن طبيعة البزنس حقي؟!

هنا ما راح نعقد الأمور ونتكلم باشياء صعبة، لكن وبكل بساطة راح نركز على أهم 5 أركان ما فيه مجال نهملها أو نتجاهلها لما نصمم مواقع الويب، يلا نبدأ بسم الله:

تصميم بسيط وفريد

تخيل حجم المنافسة في مجال تصميم الويب، وكيف الشركات تشتغل ليل نهار حتى تقدم تجربة مستخدم ممتازة لجمهورها من خلال تصاميم ويب سهلة وسلسة في الاستخدام.

يعني اليوم صار عند الجمهور خيارات مرررة كثيرة وما راح يكون مضطر إنه يواصل تصفح أو شراء من موقع أو متجر تصميمه معقد أو مش مفهوم!

كثير من الشركات وأصحاب البيزنس يستسهلون الموضوع في موقعهم ويستعملوا قوالب جاهزة ومكررة ولها مليون شبيه!

طيب ليييه الزبون يترك مواقع المنافسين -اللي أنت قلدتهم بموقعك- ويفضلك أنت؟

لازم تفهم شغلة أساسية، إذا ما كنت فريد ومميز بين كل المنافسين، فتأكد بأنك لازلت بنفس مكانك!

عشان كذا ضروري تتأكد إنه موقعك قادر إنه يترك تأثير أو استدعاء للذاكرة على الزوار، لأنه وبكل بساطة يمكن للصفحة الرئيسية لموقع الويب أن ترفع شركتك فوووق أو تنزلها بالأرض!

إذا من أهم الاشياء إننا نكون متأكدين إنه موقعنا بسيط وفريد بدون أي إضافات مالها لزوم، ونتأكد كمان إنه مثير للإعجاب بما فيه الكفاية لجذب اهتمام الجمهور المحتمل.

لأنه يمكن للزوار وبكل سهولة يخرجوا من الموقع فورًا بسبب سوء تصميم موقع الويب، لأنه وبلا استثناء، ما في زائر يحب يواجه صعوبة في التنقل بموقع الويب أو تعقيدات في عملية الشراء من متجر الكتروني.

طريقة عرض المنتجات والخدمات

في كثير من المتاجر الصغيرة لو تصفحناها بنشوف ازدحام بشكل غريب في طريقة عرض المنتجات أو الخدمات، لدرجة كافية إنها تطفش الزبون من أول مرة!

ترا قرار الزبون تجاه موقعك يصير خلال ثواني، فإما يرتاح ويواصل التصفح والتنقل، أو يطلع من الموقع بدون رجعة، وأكيد راح يتوجه لموقع من مواقع المنافسين.

يوم إنك تفكر في بيع منتجات من خلال الانترنت، لازم تستخدم صور تتناسب وتتطابق مع أوصاف منتجاتك وخدماتك، لأنه من الآخر، المنتجات المعروضة بشكل سيئ كفيلة تخلي العملاء يفكرون مرتين قبل الشراء، هذا طبعًا غير التأثير السلبي على تقييم وكفاءة متجرك.

وقت تحميل سريع

اسأل نفسك، كم ثانية ممكن تصبر على الموقع أو المتجر حتى يكتمل تحميله؟

اليوم ما في احد عنده استعداد يصبر على موقع تحميله بطيء بشكل ممل، لأنه ببساطة في بدل الموقع 1000 موقع غيره!

وزي ما قلنا  فوق إنه التصميم لازم يكون بسيط ومو لازم يكون فيه أي تعقيدات وإضافات تزيد من مدة تحميل الموقع، لأنه بطء التحميل رح يخلي العملاء المحتملين يملوا ويطفشوا.

حتى تضمن سرعة تحميل الموقع خليك حريص على اختيار استضافة ممتازة بالإضافة لتصميم ويب بسيط وسهل في التنقل.

المحتوى كلمة السر

قبل كل شيء تأكد إنه المحتوى له صلة مباشرة جدًا بهدف موقعك، حتى خوارزميات جوجل تتعرف على صفحات موقعك وتفهرسها في جوجل بكلمات مفتاحية لها علاقة بطبيعة شغلك.

 يعني تخيل تكون بتقدم خدمات في مجال البرمجة لكن محتوى صفحتك الرئيسية بتتكلم عن مجال الوسائط المتعددة!

فالمحتوى عامل مهم جدًا في جذب المشاهدين أو إبعادهم، عشان كذا لازم نعطي العناوين الرئيسية اهتمام مرررة كبير، لأنه هذا اللي يحدد هل الزوار راح يبقون داخل موقعك ولا يخرجوا فورًا.

التوافق مع الجوال

اليوم أغلب الناس بيستخدموا أجهزتهم المحمولة أكثر من أجهزة سطح المكتب أو اللاب توب، عشان كذا ضروري يكون عند الشركات موقع ويب متوافق مع الجوال ويتم تحميله بسرعة وبوضوح على شاشات الموبايل بدون تعقيدات أو تشويش.

غير كذا، Google تستخدم سرعة الصفحة كعنصر رئيسي في التصنيف والتصدر، لأنها تتوقع من الشركات أن تأخذ هذه الميزة المهمة في الاعتبار.

الخبراء يقولون أنه عشان يكون موقعك فعال لازم يكتمل التحميل في مدة أقصاها 3 ثوانٍ، وإلا موقعك راح يواجه مشاكل بالزيارات وارتفاع معدل الارتداد خصوصًا لو كان موقع جديد.

بكذا نكون تكلمنا عن أهم المعايير اللي تضمن النجاح لموقعك، وإذا عندك أي استفسارات ثانية لا تترد بالتواصل مع فريق لفل اب للحلول التقنية وتطوير البرمجيات.