تعالوا نشوف أهم الشغلات والممارسات اللي ممكن تدمر أي موقع الكتروني، وتخليه زي البيت المهجور وما يدخله أي زائر، وإن دخله يهرب بسرعة.
طبعا كلنا عارفين إنه موقع الويب هو البوابة الرئيسية والرسمية لشركاتنا أو أعمالنا اللي نسوق من خلالها منتجاتنا وخدماتنا لجمهورنا المستهدف.
وأي خلل أو مشكلة في موقع الويب فهذا يعني تطفيش الزوار وبالتالي فقدان ثقتهم بخدماتنا، يعني من الآخر كأنك بترسلهم لمواقع منافسينك بيدك، عشان كذا خلينا نعرف هذي الاخطاء ونتجنبها.
شراء دومين منتهي الصلاحية بدون فحص
كلنا بنتمنى نحصل على دومين قوي وتكون نسبة الـ(DA-PA) عالية ويكون ماسك كلمات قوية لها علاقة بتخصص عملنا وخدماتنا او منتجاتنا.
لكن زي ما إنه شراء دومين قديم وقوي في نفس مجال عملك شيء ممتاز جدًا، إلا انه ممكن يكون خطير جدًا إذا كان معاقب أو نسبة السبام سكور فيه مرتفعة أو الدومين سيء بسبب تاريخه السابق مثل إنه كان لموقع إباحي أو نصب واحتيال..الخ.
طيب كيف نتجنب هذا الغلطة؟، الحل ببساطة إننا نفحص الدومين ونشوف نسبة الـSpam Score فيه، وتاريخه السابق ونوع الكلمات اللي ماسكها، حتى نحدد هل هو دومين آمن وقوي ولا خطير ومدمر.
الموقع ما هو متوافق مع الجوال
اليوم معظم الناس يستخدمون الجوال في تصفح الانترنت، سواء كان للتسلية والترفيه أو البحث عن معلومة أو التسوق والشراء.
تخيل تفتح متجر وتلاقيه مرررة معقد لأنه تصميمه ما هو متوافق مع الأجهزة الذكية، ايش راح يكون تصرفك وسلوكك كزائر بهذي الحالة؟
أكيد ما في واحد مننا فيه حيل يعاني مع موقع مخربط أو التنقل فيه صعب ومعقد، لأنه ببساطة عندنا عشرات المواقع المنافسة الي ممكن نزورها وتلبي حاجتنا.
عشان كذا، لازم تتأكد إنه موقعك متوافق مع الجوال دون أي مشاكل او تعقيدات بالتنقل والتصفح، لأنه اليوم جوجل بتعطي الاولية للمواقع المتوافقة مع الأجهزة الذكية.
تحميل الموقع بطيء والأداء سيء
من العوامل الخطيرة اللي ممكن ما تنتبه لها هي سرعة تحميل الموقع، لأنه لو موقعك أخذ أكثر من 5 ثواني بالتحميل فأنت حرفيًا تواجه مشكلة ممكن تخسر زوار موقعك بسببها.
حتى لو كان موقع الويب منظم ومرتب والمحتوى فيه قوي جدا، فهذا كله ما له قيمة أبدًا لو كان الموقع بطيء بالتحميل بسبب حجم الصور والفيديوهات
طيب ايش الحل؟، الحل بكل بساطة هو انك تمنع إضافة صور حجمها اكثر من 100 ك.ب، والفيديوهات ممكن تحط روابط لها مثل روابط يوتيوب، حتى ما تتسبب ببطء الموقع.
إهمال ضبط السيو بالموقع
من ضمن الشغلات اللي تخلي موقعك صديق لمحرك بحث جوجل، هي تحسين صفحات موقعك للظهور في نتائج متقدمة في محركات البحث، حتى يفهم جوجل إنك مهني واحترافي بشغلك.
اهتم بالبيانات الوصفية للصفحات والأقسام والصور، واهتم بالشغلات التقنية زي السرعة والأداء، وما تنسى ضبط ملفات الـ robot.txt والسكيما وكل شيء له علاقة بتحسين صفحات الموقع.
لأنه محرك بحث جوجل بيعطي الاولوية بالترتيب للموقع المنظم والمرتب واللي شغال صح بدون غموض أو مشاكل في هيكلة الصفحات.
كمان لازم تهتم ببناء الروابط الداخلية بين الصفحات والمقالات، والروابط الخارجية الآمنة والخالية من الـSpam Score حتى توصل لمرحلة إنه جوجل يثق فيك ويعطي أولوية لموقعك بالترتيب والظهور.
نسخ لصق
إنه تشوف تجارب المنافسين وتقدم أفضل منهم فهذا ممتاز، أما إنك تنسخ محتواهم أو مقالاتهم وتلصقهم بموقعك فهذي جريمة بحق موقعك.
إياك تكرر محتوى الآخرين عندك بدون ما تضيف شيء خاص فيك، لأن إذا بدك تنافس وتتصدر لازم تكون فريد ومميز وعندك محتوى يقنع العملاء إنك مختلف عن الجميع.
مثلًا، أنا أتعامل مع متجر سين ومبسوط معه، ايش السبب اللي ممكن يخليني أتركه وأتعامل مع متجر صاد اللي فتح جديد؟
إذا متجر صاد كان مكرر وما قدم لي ميزة جديدة أو شيء واااو يخليني اتحمس واجربة، فهو بالنسبة لي شيء ما يستحق حتى إني أواصل تصفح باقي الموقع!.
الخلاصة
لما تفكر تسوي موقع ويب أو متجر الكتروني خاص فيك لازم تدرس مجالك صح وتفهم احتياجات ومشاكل جمهورك وتقدم له حلول إبداعية على شكل منتجات أو خدمات تتناسب مع إمكانياته وقناعاته.
طبعا ما تهمل الجوانب التقنية والتسويقية الضرورية لكل مشروع اونلاين، وبكذا نقدر نقول إنك بدأت صح وبشكل احترافي تقدر تنافس من خلاله وتوصل لأهدافك بأقصر و أسرع الطرق.
